MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
88
Item het was een wijff van Leijden, die was haer lijff alzo groet geheven ende die meijsters conden nijet over een coemen, wat het wesen mocht. Alzoe ghijnck zij quijnden anderhalff iaer. Ten laesten viel zij te bedden ende bleeff leggen xij daghen, dat d’meijsters geen raedt en wisten. Doe loeffde zij haer bevaert t’Amersfoert tot Onse L. Vrou ende haer lijff wert weder slijnckende, dat zij niet en wist, hoe zijt quijt wert. Ende zij quam en dede haer bevaert all hier.
89
Item het was een wijff van Utrecht, die had een kijndt van ix iaeren, dat beladen was mitten steen, alsoe zeer dat alle die vrienden iamer aen dat kijndt saghen. Alzoe dattet d’vrienden overgaven, datment snieden soude. Ende d’vader vant kijndt toech vuijt om een meijster. Ende als die vader vuijt was, hiel hem dat kijndt alzoe qualicken, dat d’moeder viel op haer knijen en seyde: “Lieve Moeder Goedts, ick love U te versoecken t’Amersfoert mit mijn kijnde, op dattet genade mach kriegen vander pijnen.” Ende die moeder heeft dat kijndt op haer schoet genomen en heeft zijn manlickheijt aengetast ende die steen is die moeder gecoemen in die handt. Ende is gesont geworden ende quam van d’selfde daghe hier. Ende dede haer bedevaert.
90
Item het was een man vuijt Vrieslandt, die een pijl ijser in zijn been gedragen had xx iaeren lanck, alzo dat zijn been all cleijn geworden was. Hij loeffde zijn bevaert tot Onse L. Vrouwe ende hij is dat ijser quijt geworden.
91
Item het waren v mannen van Antwerpen, die gevangen worden in die zee vanden Bremers ende zij saten in die stock xiij weecken lanck ende worden oock seer gepijnicht. Zij loeffden haer bevaert tot Onse L.Vrou t’Amersfoert ende zij zijn all vuijt d’stock gecoemen. En hebben haer bevaert gedaen.
