MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
92
Item het was een wijff van Boemel, die soude wat boeren, alzo dat haer die last alzo swaer wert, dat zij daer off schuerde. Dat duerde vij iaeren lanck, dat haer geen meijster helpen conde. Ende zij loeffde haer bevaert t’Amersfoert tot Onse L. Vrou en terstont wert zij gesont. Ende dede haer bevaert.
93
Item het was een man vander Goës, die vercroepelt was aen zijn been, daer hij alzo groete zeert aen lijet. Hij loeffde zijn bevaert hier tot Onse L. Vrou ende binnen ij daghen was hij gesont. Ende dede zijn bedevaert.
94
Item het was een vrou van Aernhem, die vij iaeren geweest had, dat zij dat een been voer dat ander nijet well brengen en conde. Ende het quam haer hier nae in haeren armen, dat zij mit geen krucken en conde gaen. Zij loeffde haer bevaert tot Onse L. Vrou t’Amersfoert. Ende zij wert gesont.
95
Item het was een man van Leijden, die iij weecken d’saghe alle daghen had, alzoe datter ander zijeckheijden toe sloegen ende d’meijsters hem overgaven ende oock hem selven anders nijet en bevoelde, dan hij ummer sterven most. Hij loeffde zijn bevaert t’Amersfoert tot Onse L. Vrou ende hij is terstont genesen.
96
Item het was een man van Zutpheen, d’xviij iaeren hadde geschuert geweest, alzo dat hij daer grote pijne aen hadde. Hij loeffde zijn bevaert t’Amersfoert tot Onse L. Vrouwe ende soe gerijnghe als hijt geloeft had, is hij genesen.
97
Item het was een man van Harderwijck, die hier brocht iiij boeijen, ij van zijn handen ende ij van zijn beenen, daer hij twe iaeren mede gesloten had geweest, om dat hij zijnre sinnen bijster was. Hij loeffde zijn bevaert hier ende hij genas.
