MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
108
Item het was een jonckman te Parijs, die daer had een zeere voet, daer hij nijet en mocht op stoenen. Ende hem docht, dat die meijsters zijn voet meerder verderffden, dan zij beterden. Hij koft een peert om op te rieden van Parijs tot Brugge. Doe hij vj mijelen was gereden, doe stortede dat peert ganck over ganck ende hij en conde nijet gaen. Doe loeffde hij Onse L. Vrou te versoecken t’Amersfoert, eer hij t’huijs quam ende dat peert stortede nijet meer. Ende zijn voet wert gesont.
109
Item het was een man vuijt Oostlandt, die vj weecken lanck blijnt was mit beijde zijn oghen. Hij loeffde Onse L. Vrou t’Amersfoert te versoecken. Ende hij wert siende.
110
Item het was een man vander Goude, die in eenen groten sturm gevallen was vuijten schepe wel ij roeden daer van. Hij loeffde zijn bevaert tot Onser L. Vrouwen ende hij quam weder int schip.
111
Item het was een man van Dieveren, die verlamt was in beijden beenen, dat hij in langer tijt nijet gaen en conde. Hij loeffde zijn bevaert Onse L. Vrou te versoecken mit ij wasschen beenen. Ende hij wert gesont.
112
Item het was een wijff, die xviij weecken lanck een quaden aerm gehadt had, dat zij meenden lam te blieven. Ende zij loeffde haer bevaert tot Onse L.Vrouwen t’Amersfoert mit eenen silveren arm te offeren. Ende zij is gesont geworden.
113
Item het was een man van Ven, die een swell chreech achter bij zijn fundament. Ende daer wert hij mede verstoppet, dat hij nyet loezen en conde. Hij loeffde Onse L. Vrou te verzoecken mit een wasschen beelde in alzucken schijn als hem dat zeer was. Ende hij wert verlicht.
114
Item het was een man d’op zijn lijff gevangen sat in die stock. Hij loeffde Onse L.Vrou te versoecken mit een wasschen stock. Ende hij wert verlost.
