MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
117
Itemn het waren iij mannen vuijt den lande van Cleve, die gevangen waren int Sticht van Colln op een slotte, daer zij gesloten worden in een stercke stocke mit ij swaere slooten, d’wel soe swaer waren als een schepel roggen. Ende die stock was toe gemaeckt mit stercke houte nagelen. Doe zij aldus saten, spraecken zij malcander toe ende loeffden haer bevaert tot Onser L. Vrouwen t’Amersfoert ende te hant vanden zij een houtken van een beesem, daer zij die stock mede op deden. Ende die naghelen ghijngen bij hem selven op. Ende zij ghijngen van dijen, vrij ende los. Ende een van hem iij quam hier en dede zijn bevaert.
118
Item het was een man vuijt Hollandt bij den Haghe ende begonde bijster zijnre sinnen te werden, alzoe dat hij bij nae vuijt zijnre meenen was. Hij wert t’Amersfoert gebrocht voor Onse L. Vrouwen beelde ende hij is tot zijn verstant gecoemen.
119
Item het was een wijff, die bij Aernhem woende ende was swaerlicken bezuket. Zij heeft haer bevaert geloeft tot Onse L. Vrouwen t’Amersfoert ende voert wert zij nijet meer bezuket.
120
Item het was een man, die te Versevelde woenden in die heerlickheijt van Wijsch. Deze had een zoen, die all doeff was. Hij loeffde zijn bevaert tot Onser L. Vrouwen t’Amersfoert ende zijn zoen wert weder hoorende.
121
Item het was een man van Heerd ende was gevaren mit zijn geburen om rijs, daer hij inden weghe viel, alzo dat hij een halff ure voor doot lach. Die bij hem waren hebben haer bevaert geloeft tot Onser L. Vrouwen tot Amersfoert, dijen haer beeldt inden water gevonden is, ende terstont ontwerpt hij weder ende is gesont geworden.
