MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
122
Item het was een man van Steenwerden ende wert mit een bijel in zijn hoeft geworpen, dat hij ter aerden viel ende daer mede wert hij beroert mit die popelzije, dat hij zijn handt mit zijn arm nijet opheffen en conde. Dese man had een vriendt, die zijn bevaert loeffden tot Onse L. Vrouwen t’Amersfoert mit een wasschen beelde van iiij pont. Ende hij wert gesont ende dede zijn bevaert.
123
Item het was een man van Groenijnghen, die groet gebreck had aent water, alzoe dat hij drie vierdel van een elle dicker was geworden, dan hij plach te wesen. Hij loeffden Onse L. Vrouwe t’Amersfoert te versoecken ende binnen een corte tijt daer nae wert hij gesont.
124
Item het was een man op S. Bartholomeus avont van over hondert mijelen weghes in zoe grote last van water, dat hij anders niet en wiste, dan hij drencken soude. Doe hoerden hij segghen van zijn gesellen van Onse L.Vrouwe t’Amersfoert. Hij loeffde zijn bevaert ende hij quam gesont te lande. Ende dede zijn bedevaert.
125
Item het was een man van Apeldoorn, die viij weecken blijnt was. Die quam hier en liet hem weghen mit wijn en mit weijt. Toe toech hij t’huijs ende hij wert siende. Doe quam hij terstont wederomme ende danckte Onse L.Vrouwe anderwerff.
126
Item het was een kijndt van Hoorn, dat een iaer blijnt was. Die ouders loeffden Onse L. Vrouwe te versoecken mit den kijnde ende het kijndt wert weder siende mit een oghe, daert mede blijnt geweest had.
