MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
127
Item het was een man, die in die soute zee was, daer hem een sturm aenstack, alzoe dat zij haer ancker vuijt worpen, doe zij onder die Schellinck quamen. Doe loeffden zij haer bevaert t’Amersfoert tot Onser L. Vrouwen. Toe helter een ancker ende zij sijnt gecoemen ende hebben haer bevaert gedaen.
128
Item het was een man van Cortehoeff, die geslaghen was tusschen zijn scholderen mit een bijel, datter zijn adem door ghijnck ende lach in groter raserie, dat hem d’meijsters tot Utrecht overgaven. Hij loeffde zijn bevaert in linne clederen Onse L. Vrouwe t’Amersfoert te versoecken ende hij is in iiij of v uren ontslaep geworden. Ende doe hij weder ontwaecte, docht hem, dat hij nijet gewont en was. Ende hij is daer nae terstont gebetert.
129
Item het was een man van Wesep ij mijelen boven Deventer, die ij daghen ende ij nachten bloeijden, datmens nijet stempen en mocht. Ende zijn vrienden docht, dat hij doot blijeven most. Hij loeffde zijn bevaert tot Onse L. Vrou t’Amersfoert. Ende hij wert gesont.
130
Item het was een vrou van Wagenijnghen van 60 iaeren, die xiiij daghen blijnt geworden was. Zij loeffde haer bevaert tot Onse L. Vrou ende zij wert siende.
131
Item op die selffde tijt quam hier een wijff, die een iaer aen die saechge zijeck geweest had. Zij loeffde haer bevaert. Ende zij wert weder gesont.
