MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
144
Item het was een ionghe maghet van Aernhem, die zoe seer verleemt was xij maent in haer leijnden, dat mense mit een slaeplaecken om weijnden most. Zij loeffde haer bevaert hier tot Onse L. Vrou ende te hant begost zij te gaen mit krucken ende binnen corter tijd wert zij gesont. Ende dede haer bevaert.
145
Item het was een cloester jonckvrouwe van Utrecht, die groet gebreck in haer hoeffde had, daer zij wel viij iaer aen gemeijstert hadde ende een kussen van medicinen daer op plach te draghen. Zij loeffde haer bevaert tot Onser L. Vrouwen ende werpt het kussen van haer hoeffde. Ende zij wert weder gesont ende wel te pas.
146
Item het was een kijndt van Remmerswae ende soude varen mit ander luijden in een water, wel xx vadem diep, daert over boert viel ende die luijden conden dat schip tot den kijnde nijet brenghen. Zij loeffden haer bevaert tot Onse L. Vrouwen tot Amersfoert, mochten zijt chriegen, ende terstont werpt hem die wijnt wederomme, alzoe dattet schip bijden kijnde quam. Ende zij langheden hem een boem, daer zij het mede int schip thogen.
147
Item het was een ionc knecht, die in ij iaeren zijn water nijet en conde gehouden, daer hij veel raedts omme gesocht hadde, dat hem all nijet en holp. Doe loeffde hij zijn bevaert tot Onse L. Vrouwen t’Amersfoert. Ende hij wert geheel gesont.
