MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
148
Item het was een man van Gorkum, die langhe tijt een aposteem in zijn blase gedraghen hadde ende oock seer becoemert was vanden steen. D’Aposteem bestont hem te sweeren, dat hij rieden noch gaen en conde. Doe loeffde hij zijn bevaert tot Onse Lieve Vrouwe t’Amersfoert ende hem ghijngen wel xij steenen off. Ende hij is van diese beijde zuuckten weder gesont geworden.
149
Item het was een vrou vant Goeye, die een pijnlick lichaem creech, alzoe dat all haer leden opgeswollen waren als een vat. Daer nae creech zij een stop in haer keel, dat zij nijet spreecken en conde wel vijff uren voor doot lach. Die buer loeffden haer bevaert tot Onse L. Vrouwen ende te hant sprack zij: “Maria heeft mij geholpen.” Ende zij is gecoemen ende heeft gesont haer bevaert gedaen.
150
Item het was een man van Dortman, die zeijlen quam vuijt Noorweghen mit vijff schepen. Die wijnt iaechdese op een steen roedse, daer zij haer schepen te samen bonden mit grote cabelen. Doe sprack daer een schipknecht, dat zij haer bevaert loven souden t’Amersfoert, dat zij nijet en achten. Maer dese knecht loeffde Onse L. Vrou te versoecken mit offerhande. Sich, doe scheijde hem zijn schip vanden anderen ende die wijnt viel hem mede ende hij is behouden te lande gecoemen. Ende die anderen, die bij hem waren, zijnt bedorven.
