MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
151
Item het was een knecht van xv iaeren, die nije zijn water en conde gehouden, alzoe dat hij gheen ambacht en conde gedoen. Die vrienden loeffden haer bevaert tot Onser L. Vrouwen. Ende hij wert gesont.
152
Item het was een vrou van Leijden, die beseten was mitten boosen gheest, daer zij swaerlicken off gepijnicht wort. Zij loeffde haer bevaert t’Amersfoert ende doe zij inden weghe was op een waghen, hoe zij naerder Amersfoert quam, hoe zij quaeder wert mit onzeghen gelaet. Zij swol groet van lichaem overmits boesheijt des vijants. Ende als zij bij Amersfoert quam wert zij overgevende ende sprack: “Lieve vrienden, dancket die Moeder Goets, want ick ben verlost.” Ende zij is gecoemen tot Onse L. Vrouwe zedich ende wel te passe.
153
Item het was een vrou van Calcar ende had een zoen van xv iaeren ter schoelen gaen, die een zucket creech, alzo dat hij ij iaeren lanck lach, datmen hem om moste weijnden mit een slaeplaecken. Seen ende arm, ontwee gestoeten, zijnt weder te samen geset, recht off het mit wasch geleemt. Zijn beenen wiessen hem d’ een over den ander ende hij creech vleijsch op zijn huepen, alzoe groet als potten van ij quaerten ende dat begon te sweeren ende daer ghijngen vuijt ij cleijne beencken. Die moeder loeffde haer bevaert tot Onse L. Vrouwen. Doe verghijnck dat vleijsch ende hij begost te gaen, maer groete pijn leet die knecht. Als hij zijn bevaert gedaen hadde, zijn moeder wies hem in dat water, daer dat beeldt gevonden wert. Doe soe sprack die knecht tot zijn moeder, dat hij geen pijn en had. Ende hij is wederomme gesont te huijs gegaan.
