MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
160
Item het was een man vuijt Enghelandt cc ende xx mijelen boven Lonnen, die op zijn bedde lach, ontsteecken mit Sint Anthonis vuer, all swert over zijn been, datmen des anderen daghes off gesaghet soude hebben. Ende inder nacht docht hem, dat hem geseijt wert: “Loeft U bevaert t’Amersfoert”. Dat hij dede ende nijet en wiste, waer Amersfoert was, daer hij nae vraechde. Ende quam en dede zijn bevaert, sterck ende gesont. Maer dat been was wat roode.
161
Item het was een vrou vuijt Vrieslandt ende had haer cost gecoft in een cloester, daer oock een cleijn beeldt was van Maria, daer Jesus haer kijndt grote genade doer dede. Als zij had wel ij iaeren gelegen croepel, als zij sliep, haer dochte, dat zij voor Maria was ende sach wonderlicke puncten. Zij sprack: “Maria, wildij mijn hebben, maeckt dat ick mach wandelen sonder krucken. Ic zall daer coemen.” Zij stont op ende dede haer bevaert, gesont ende sterck, tot Maria.
162
Item het was een vrou vander Goude, die lange tijt een sware zuket gehadt hadde, daer zij groet goet aen vermeijsterde ende geen meijsteren conde geweeten, wat haer letten. Ende wert driewerff bericht mitten H. Sacrament in haer bedde. Zij hoerden segghen van die wonderlicke genade Onser L. Vrouwen t’Amersfoert. Daer loeffde zij haer bevaert ende binnen iij daghen daer na stont zij op. Ende heeft haer bevaert gedaen.
