MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
163
Item het was een kijndt van Emmerick van iij iaeren, dat blijnt geworden was vanden pocken, alzoe dat die meijsteren van mijn heere van Cleve daer geen licht aen en mochten mercken binnen vj maenden. Die moeder loeffde haer bevaert tot Onse L. Vrou. Doe ghijngen hem groete schellen van zijn oghen. Ende wert siende wederomme.
164
Item het was een man gevangen tot Breda ende men wist anders nijet, dan men hem soude onthalsen. Zijn wijff quam in haeren slaep voer, als haer dochte, dat zij bevaert t’Amersfoert tot Onse L. Vrou loven soude, haer man en soude geen pijn aengedaen worden. Zij loeffde Onse L. Vrou te versoecken mit een wasschen stock ende des anderen daghes quam hij vuijt door een stercke toorn. Ende hij quam hier en dede zijn bevaert.
165
Item het was een schipman van Danswijck vuijt Pruissen ende quam zeijlen in die zee mit een groet schip, daer inne waren wel xv mannen. Doe stack hem aen een grote sturm, dat zij schipbroeckich worden ende alle bedorven vuijtgesondert dese man, quam op een tafel ende dreeff IX uren inder zee. Hij wert denckende op Onser L. Vrouwen t’Amersfoert, die hij loeffden daer te versoecken mit een scherp haren cleet over zijn blote lijff ende doe was hij noch wel vij mijelen vanden lande. Doe dat geschiet was, sach hij vuijtten Oosten coemen een schoene claerheijt ende daer mede een cleijn beeldeken van Onser L. Vrouwen ende te handt is hij mit den tafel aent landt geset ende heeft dat haren cleet aengetoghen ende droech dat dach ende nacht ter tijt toe, dat hij zijn offerhande gedaen hadde. Ende hij seijde claerlick, dat beeldeken, dat hij in die zee mit dier claerheijt gesien had, gelijck was, dat hij hier sach ende inden water gevonden is. Ende hij hangede dat hare cleedt voert t’beeldt van Maria, als ghij sijen moghet daer hanghen voer Maria.
