MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
168
Item het was een man van Campen ende sat tot Campen bijder clocken en dranck mit een deel goeder mannen, alzoe dattet hem aen quam daer hij sat, dat hij nijet spreecken en conde ende was seer in hem selven bedroeft. Hij stont op ende ghijnck t’huijs. Ende doe hij aldus te huijs quam, was zijn huisfrou ende zijn buren desgelijcxs seer te onvreden. Ende in deser droeffenis stont die man op ende is achter in zijn huijs gegaen ende viel op zijn knijen ende wert denckende op Onser L. Vrouwen beeldt, dat t’Amersfoert gevonden was inden water. Ende docht daer Onse L. Vrou mit ijnnicheijden, wollen ende bervoets, te versoecken. Rechtevoert als dit gedaen was, is hij volcoemelick weder spreeckende geworden.
169
Item het was een man van Dordrecht, die xiij iaer lanck een lopent gat gedragen had aen zijn fundament ende hij en conde geen meijster chriegen, diet hem helen conde. Zijn wijff badt hem vriendelick, dat hij zijn bevaert woude loven tot Onse L. Vrouw t’Amersfoert. Ende als hij zijn bevaert geloeft had, wert hij binnen iiij daghen daer nae gesont.
170
Item deze mans broeder had een kijndt, dat ij daghen lanck blijnt geweest had. Die moeder loeffde haer bevaert mitten kijnde tot Onser L. Vrouwen. Ende binnen ij uren wert dat kijndt weder siende.
171
Item het was die coster van Swartewael bijden Brijel, die groet gebreck had aen den steen. Hij loeffde zijn bevaert tot Onser L.Vrouwen t’Amersfoert ende binnen een halff ure ghijngen hem viij steenen off. Ende hij wert gesont.
