MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
175
Item het was een kijndt vander Goude, dat wel een ure verdrenct was. Die ouders loeffden dat kijndt tot Onser L. Vrouwen te weghen mit wijn ende weijt voer dat beeldt, dat inden water gevonden is. Ende terstont isset kijndt weder levendich geworden. Ende zij hebben haer bedevaert hier gedaen.
176
Item het was een man van Fasen, die had een iaer op krucken gereden. Die loeffde zijn bedevaert ende is gesont geworden. Ende heeft zijn bevaert gedaen.
177
Item het was een vrou van Duselweerde bij Cleve, die was alzoe groff geworden, dat zij alzoe zijeck ende cranck wert, dat zij vijff weecken te bedde lach. Ende zij wert bericht in all haer ambachte. Ende wat raedt zij aen die meijsters socht, zij en conden haer nijet helpen. Doe wasser een, die haer seijde, dat zij haer bevaert t’Amersfoert loven soude tot Onser L. Vrouwen. Ende doe zij het gedaen hadde, beterde zij van daghe tot daghe, alzoe dat zij op die vijfte daghe begoste te gaen. Ende op den achtste dach daer nae was zij gebetert ende ghijnck vuijt. Ende dede haer bevaert.
178
Item het was een man van Enchusen, die quam van Hamburch ende soude varen t’Amstelredam, doe hij quam tusschen die Elve ende tVlij. Ende zij dreven twe daghen mit een nacht op Goedts genade ende zij meenden te hant te drencken. Ende d’schipper vant schip loeffde Onse L. Vrouwe t’Amersfoert te versoecken. Terstont zeijlde hij te lande sonder enich gebreck.
