MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
191
Item het was een man van Harderwijck ende was lange bezuket geweest van den water seer swaerlick. Doe riedt hem die pastoer, off kerckheer, dat hij zijn bevaert soude love tot Onse L.Vrou tot Amersfoert ende te hant wert hij gesont ende schoen van lichaem, als hij ije geweest hadde. Ende dede zijn bevaert mit blijdschappen.
192
Item het was een jonck kijndt vander Goude ende was seer gepijnicht vanden steen, alzo dattet geen water mocht holden ende lach slaende ende schreijende mit handen ende voeten. Doe hebben die ouders geloeft haer bevaert t’Amersfoert ende te hant ghijnck dat kijndt off een steen, die zij brochten voer Onse L. Vrouwen. Ende deden haer bevaert mit groter eerweerdicheijt.
193
Item het was een jonck wijfken vuijt Niderstant ende beviel in eenen craem ende wert bezuket seer verveerlick van Sint Cornelis plaghe. Doe heeft haer man geloeft haer bevaert, Maria te versoecken t’Amersfoert mit zijn wijve ende daer nae wert zij niet meer bezuket, ende zij quam mit blijdschappen, ende liet haer weghen costelick.
194
Item het was kijndt van Jutfaes, ende was lange tijt cruepel ende lam mit beijen beenen. Die olders loeffden haer bevaert tot Onse Lieve Vrouwe t’Amersfoert ende dat kijndt bestont te gaen ende dede zijn bedevaert.
