MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
200
Item het was een knecht vuijt den lande van Gelre ende creech een scherp hout in zijn oghe, alzoe lanck als een halff lit eens cleijne vijngers, alzoe dat het oghe bestont hem te sweren ende gheen meijster mocht hem helpen. Ende hij meenden dat het oghe vuijt had geweest. Hij loeffde zijn bevaert t’Amersfoert aen Maria ende aen zijn wijnbrauwen swoer een gat, daer dat hout doer quam vuijt zijn oghe, ende wert siende, ende quam tot Maria haer danckende mit zijnen offerhande.
201
Item het was een man van Utrecht, die lange tijt was doeff geweest. Hem wert gewesen, dat hij soude loven zijn bevaert tot Maria t'Amersfoert ende te hant wert hij hoorende ende danckte Maria: ende zijn wijff quam t'Amersfoert en dede zijn bedevaert mit offerhande.
202
Item het was een rijck wel geboren man ende was mit een sweerde dwers over zijn hoeft gecloeft, alzo dat die harn soeit vuijt zijn hoeffstoel als een pot. Waerom dat hem geen meijster dorst onderwijnden te cureren. Doe riep hij aen mit devotien die Maghet Maria tot Amersfoert ende die wonde wert zeedich en geheelt in corten tijden. Ende hij quam selver en dede zijn bevaert ende openbaerde daer die wonde ende wat genade dat hij ontfangen hadde van Maria.
203
Item het was een man van Zulvolden inder heerschappie van Wis, ende hij wert gewont ter doot toe, dat zij hem voor doot lieten leggen; ende hij wert denkende aen die ghenade van Onser L. Vrouwen beelde t'Amersfoert: ende hij loeffde zijn bevaert mit vlas ende wasch Onse L. Vrouwe te versoecken ende hij wert gesont, ende dede zijn bevaert. Ende zijn offerhande, die hij offeren soude, wert hem gestolen, ende die man wert rasende, die hem die offerhande stall.
