MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
203
Item het was een man van Zulvolden inder heerschappie van Wis, ende hij wert gewont ter doot toe, dat zij hem voor doot lieten leggen; ende hij wert denkende aen die ghenade van Onser L. Vrouwen beelde t'Amersfoert: ende hij loeffde zijn bevaert mit vlas ende wasch Onse L. Vrouwe te versoecken ende hij wert gesont, ende dede zijn bevaert. Ende zijn offerhande, die hij offeren soude, wert hem gestolen, ende die man wert rasende, die hem die offerhande stall.
204
Item het was een knecht van Wesel, olt xviij iaer, seer swaerlick bezuket van die plaghe S. Cornelis ende had zijn bevaert gedaen boven Aken en te Coelen, het en baete hem nijet. Seer swaerlicker creech hijt. Doe sprack hij: " Maria, mocht ick chriegen respijt in gesontheijt drie daghen, ick wolde versoecken Maria t'Amersfoert." Ende te hant bleeff hij gesont en quam t'Amersfoert en dede zijn bedevaert mit blijschappen.
205
Item het was een man van Naerden, ende was seer bezuket vanden water lange tijt. Overmits onderwijsen zijns pastoers, soe loeffde hij zijn bevaert tot Onse L. Vrouwe t'Amersfoert ende in corter tijt wert hij gesont sonder medicijnen, overmits hulp der maghet Maria; ende quam en dede zijn bevaert mit zijn offerhande.
206
Item het was een man vuijt den lande van Gelre, ende hadde wel iiij seere lopende gaten van Sint Quirijns zuijckt, Hij dede zijn bevaert tot Micen, ten baete nijet. Doe loeffde hij zijn bevaert t'Amersfoert tot Onse L. Vrou te coemen, alsoe verre als zijn beenen gesont worden in XL daghen. Ende eer vijff daghen, soe was hij gesont ende quam mit blijschappen en dede zijn offerhande tot Maria.
