MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
206
Item het was een man vuijt den lande van Gelre, ende hadde wel iiij seere lopende gaten van Sint Quirijns zuijckt, Hij dede zijn bevaert tot Micen, ten baete nijet. Doe loeffde hij zijn bevaert t'Amersfoert tot Onse L. Vrou te coemen, alsoe verre als zijn beenen gesont worden in XL daghen. Ende eer vijff daghen, soe was hij gesont ende quam mit blijschappen en dede zijn offerhande tot Maria.
207
Item het was een vrou woenende binnen Amersfoert ende had een ionck kijndt van xv weecken, dat seer bezuijcket was van Sint Cornelis ongemack, alzoe dat zij haer bevaert loeffden mitten kijnde ende mit maechden tot Onse L. Vrouwen, die inden water gevonden wert; ende doe zij haer bevaert gedaen hadde, doe wert dat kijndt weder bezuijcket alzo meinnich werff, dat die buren daer aen saghen: groet iamer. Doe loeffde die moeder op Onse L. Vrouwen dach, mocht haer kijndt genesen tussen die tijt ende middewijnter, zij soude haer kijndt doen weghen voer Onser Vrouwen op den H. Karsavont mit wijn ende weijt, silver ende gout: ende dat wert op den selven nacht verlost. Zij deden haer bevaert ende danckten God ende Maria zijnre lieve moeder.
208
Item het was een ionghe maghet van Bekbergen, die lange tijt was cranck in haerre sinnen; alzoe, dat die buren meenden, dat zij waer beseten geweest. Op den heijlighen Karsavont spraecken die naeburen: " Loeft u bevaert t'Amersfoert tot Onze L. Vrou." Als die olders haer bevaert hadden geloeft, des avonts soe sprack die maghet, die daer lach gebonden mit stercken banden: "Moeder, ontbijnt mijn, ick wil eeten, Maria heeft mijn geholpen." Zij aten t'samen mit blijschappen ende quamen en deden haer bevaert blijdelicken.
