MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
208
Item het was een ionghe maghet van Bekbergen, die lange tijt was cranck in haerre sinnen; alzoe, dat die buren meenden, dat zij waer beseten geweest. Op den heijlighen Karsavont spraecken die naeburen: " Loeft u bevaert t'Amersfoert tot Onze L. Vrou." Als die olders haer bevaert hadden geloeft, des avonts soe sprack die maghet, die daer lach gebonden mit stercken banden: "Moeder, ontbijnt mijn, ick wil eeten, Maria heeft mijn geholpen." Zij aten t'samen mit blijschappen ende quamen en deden haer bevaert blijdelicken.
209
Item het waren ij ionghe mannen van Amsterdam, ende quamen zeijlen op S.Thomas dach in die zee voer der Elburch, ende bleven daer legghen bevroeren inden ijesse. Als zij daer laghen op de hoechtijt van alre kijnderen, doe bestont dat ijesse te craecken en te schueren, overmits die wijnt, alzo dat daer ij gaten schoerden in dat schip. Daer quam een grote scholle ijesses onder dat schip, alzoe dat het schip geladen op zijn zijde quam, ende dat schip vervulde hem mit grote scholle ijesses. Als dat schip bestont te sincken, spraecken die schipknechten: " O Maria van Amersfoert, gevonden inden water, verlost ons van Onse noot. Wij sullen u versuecken mit onse gaven." Te hant quam daer een wijndt en richte dat schip, ende zij deden dat ijesse vuijt den schepe ende dat water wert claer. Ende zij zeijlden aent landt, ende haer cabel was nijet geschuert vanden ijesganck. Ende quamen tot Maria mit blijschappen en deden haer bevaert seer devotelick.
210
Item het was een knecht van Emmenesse seer bezuijckt vanden plage S. Cornelis. Hij loeffde zijn bevaert t'Amersfoert, ende als hij zijn bevaert had gedaen, bleeff hij sterck ende gesont doer genaden Mariae.
