MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
211
Item het was een man van Amersfoert ende hadt een ionck kijndt olt een halff iaer, ende creech in zijn keel een graet, lanck ende groet een lit van een vijnger mit iij lange tanden ende dat kijndt bestont swert te werden en te worghen. Die moeder sloech haer handen ende rijep ellendelick. Die buren quamen ende namen dat kijndt ende brochtentvoer Onse L. Vrou en lietent weghen ende zij rijepen Ons L. Vrou aen, ende dat kijndt bestont te bloden inder keelen ende dat been des vissches ghinck vuijt den keelen, ende die vrouwen ghijngen mit blijschappen weder t'huis, danckende ende lovende Maria.
212
Item het was een schipman mit iij knechten mit zijn schip bevroren int ijesse tusschen Dort ende Geertruijt ten berghe, voor iaers dach, als dat ijesse bestont te schoeren ende die cabel ontwee wolde snieden. Zij aenriepen d'maghet Maria t'Amersfoert, ende loeffden haer bevaert. Ende te hant quam daer een wijnt en schoerde dat ijesse, ende maeckten een pat int water ende zij zeijlden tot Dort zonder anxt. Ende zij quamen mit blijschappen danckende Mariae.
213
Item het was een ionghe maghet van Amersfoert, ende atte mit haer moeder ende zij wert beroert vander popelcien, alzoe dat haer mont ghijnck staen bij haer ooren. Die moeder riep in haer buren mit schreijen. Zij loeffden te samen haer bevaert ende die mont bestont te hant te staen op zijn steede. Doe quamen die naeburen mit die moeder en deden haer bevaert mit blijschappen voer Maria mit devotien.
