MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
213
Item het was een ionghe maghet van Amersfoert, ende atte mit haer moeder ende zij wert beroert vander popelcien, alzoe dat haer mont ghijnck staen bij haer ooren. Die moeder riep in haer buren mit schreijen. Zij loeffden te samen haer bevaert ende die mont bestont te hant te staen op zijn steede. Doe quamen die naeburen mit die moeder en deden haer bevaert mit blijschappen voer Maria mit devotien.
214
Item het was een man woenende te Laren, ende was malende op een rosmuelen. Ende daer liep zijn kijndt van ix iaren spuelen in die rosmuelen ende ghinck legghen op dat radt van die muelen om te rieden, gelijck die kijnder pleghen. Als dat kijndt quam bijder asse soe bleven zijn cleder hanghen aenden rade, alzoe dat dat kijndt bleeff steecken tusschen t'radt ende die asse, alzo dat die paerden stonden op dat kijndt, alzo drie mannen dat kijndt niet en conden getrecken vuijt die muelen. Zij sprongen dat muelen radt ontwee. Als zij dat kijndt vuijt hadden, soe en vonden zij geen teijken des levens. Ende riepen aen die maghet Maria t'Amersfoert, ende te hant ontwerpt dat kijndt ende sprack den alden toe. Zij quamen mit ijnnicheijt en deden haer bevaert t'Amersfoert ende lietent
daer weghen mit wijn ende weijt ende danckten Mariam loeffelick.
215
Item het was een man van Nijmmeghen d'zijn mont alsoe, overmits popelcie, wert getoghen over die luchter ziede, bijkants aen zijn ooren, dat hij mit zijn rechter oghe nijet sien en conde, ende oock nijet eeten en conste acht daghen lanck. Hij loeffde zijn bevaert totten heijlighen Cruce te Craenenborch, ten holp hem niet. Het quam in zijn visioen dat hij dat hij zoude loven tot Onse L. Vrouwe t'Amersfoert ende te hant wert hij gesont ende dede zijn bevaert tot Maria blijdelick.
