MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
215
Item het was een man van Nijmmeghen d'zijn mont alsoe, overmits popelcie, wert getoghen over die luchter ziede, bijkants aen zijn ooren, dat hij mit zijn rechter oghe nijet sien en conde, ende oock nijet eeten en conste acht daghen lanck. Hij loeffde zijn bevaert totten heijlighen Cruce te Craenenborch, ten holp hem niet. Het quam in zijn visioen dat hij dat hij zoude loven tot Onse L. Vrouwe t'Amersfoert ende te hant wert hij gesont ende dede zijn bevaert tot Maria blijdelick.
216
Item het was een man vuijt Walgeren in een schip op die Noortzee, ende wort blijnt sonder pijn eenen nacht ende eenen dach, alzoe dat hij nijet sien en conste dat licht eenre keersen. Ende daer waren luijden in dat schip van Amsterdam, die spraecken van die ghenaden Mariae tot Amersfoert. Als hij dit hoorden, hij loeffde zijn bevaert t'Amersfoert. Te hant wert hij claerlick siende.
217
Item het was een vrou vanden Brijel, ende was geweest cruepel wel ij iaer, alzoe dat zij nijet gaen en mocht. Zij hoerden van die ghenaden Mariae t'Amersfoert. Zij loeffden haer bevaert te doen mit offerhande ende te hant bestont zij te voelen haer leden, die verdorret waren. Ende bestont te gaen mit krucken ende quam t'Amersfoert en dede haer offerhanden mit blijschappen ende liet haer crucken voor Maria ende ghinck gesont t'huijs mit blijschappen.
218
Item het was een vrouw vanden Grave, ende was iiij daghen lanck doeff, alzoe dat alle menschen seer verwonderden. Doe weesen haer goede pilgrommen dat sij solde loven haer bevaert tot Maria t'Amersfoert. Ende te hant wert zij hoorende ende quam mit schoene offerhanden ende danckte Maria.
