MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
218
Item het was een vrouw vanden Grave, ende was iiij daghen lanck doeff, alzoe dat alle menschen seer verwonderden. Doe weesen haer goede pilgrommen dat sij solde loven haer bevaert tot Maria t'Amersfoert. Ende te hant wert zij hoorende ende quam mit schoene offerhanden ende danckte Maria.
219
Item het was een suverlick iongelinck en spielden mit jonckfrouwen ende sach een schone budel hebben een jonckfrou. Hij sneedt haer die budel off mit den gelde. Hij wert gevangen ende swaerlick gestocket. Als men hem soude hangen des smorgens, die stockmeijster sprack: "Loeft u bevaert tot Maria t'Amersfoert." Als hij mit tranen zijn reijnicheijt loeffden haer eweelick te dienen, mochte hij verlost worden. Overmits die crachten Mariae, soe en kennende d'vrou haer budel nijet ende ondroech den iongelinck. Ende hij wert verlost, ende die stadt most hem doen beterijnghe voer zijn smart ende schande. Ende hij quam bervoets ende bloetshoeft en dede zijn bevaert mit offerhande ende ghijnck in een cloester.
220
Item het was een vrou van Aernhem, ende had een kijndt olt ij iaer, ende creech een scherp ijser in zijn keel, alzoe dat het kijndt wolde sticken ende swart in zijn aensichte bestont te werden ende hem ter doot bereijde. Die meijster solde dat bestaen te vijnden mit silveren instrumenten. Hij en voelde nijet. Die moeder loeffde haer bevaert t'Amersfoert ende dat ijser brack aen ij stucken ende spranck wel vijff voeten vuijt d'keel. Ende zij quamen mitten kijnde t'Amersfoert mit schoene offerhanden.
Dese miraculen ende gracien zijn geschiet van Maria sunt des sonnendaechs voer Pijnxteren in desen JAREN M. CCCC.xL viiij.
