MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
221
Item het was een Jonckman van Willemick in Vrieslandt, ende lach iiij iaeren te bedden aen een zuijckte mit groter pijnen, dat niemant en conde onderscheijden van geen meijsteren der medicijnen, wat zuijckte hij hadt. Als hem overgaven alle meijsteren, soe wert hij onderwesen, dat hij solde loven zijn bedevaert tot Maria. Als hij die bevaert had geloeft tot Maria t'Amersfoert, overmits die genaden Mariae wert hij soe sterck in iiij daghen, dat hij te voete quam t'Amersfoert, ende brocht zijn offerhande gesont mit blijschappen.
222
Item het was een vrou van Zutpheen, ende had gechreghen een lichaem van ongesontheijt, alzoe groff ende hardt well wijt drie ellen, dat zij hadde gehadt wel een iaer mit groter pijnen. Als zij haer bevaert hadde geloeft, soe wert sij te hant binnen viij daghen dat lichaem quijt, ende quam tot Maria t'Amersfoert doende haer bevaert.
223
Item het was een coopman vuijt Noorweghen, ende viel seer hoghe, alzoe dat vuijt nueijs ende mont zijn bloeit liep, ende alzo sijn lijff gequest hadde, dat hij lange te bedden lach sonder spreecken. Als hem geen meijster helpen mochte ende hem ter doot waert schickte, soe wert hij denckende op Onse L. Vrou t'Amersfoert, ende loeffde zijn bevaert mit harten haer te versoecken mit offerhande. Ende die doot vlacken vuijtgeslegen waren. Hij en wolde die keerse nijet hebben naeder geloeften; t'handt hij bekennende ende binnen x daghen bestond hij zijn bevaert te doen, ende quam gesont t'Amersfoert mit blijschappen, ende hij dede een schoene offerhande bij Maria.
