MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
223
Item het was een coopman vuijt Noorweghen, ende viel seer hoghe, alzoe dat vuijt nueijs ende mont zijn bloeit liep, ende alzo sijn lijff gequest hadde, dat hij lange te bedden lach sonder spreecken. Als hem geen meijster helpen mochte ende hem ter doot waert schickte, soe wert hij denckende op Onse L. Vrou t'Amersfoert, ende loeffde zijn bevaert mit harten haer te versoecken mit offerhande. Ende die doot vlacken vuijtgeslegen waren. Hij en wolde die keerse nijet hebben naeder geloeften; t'handt hij bekennende ende binnen x daghen bestond hij zijn bevaert te doen, ende quam gesont t'Amersfoert mit blijschappen, ende hij dede een schoene offerhande bij Maria.
224
Item het was een rijcke vrou van Hockenberch, ende was seer swaer beladen volle waters. Als zij nijet en mocht worden geholpen, overmits medicijnen, soe loeffde zij haer bevaert t'Amersfoert te coemen, mit haeren offerhanden. Te hant soe ghijnck haer off dat water ende wert gesont binnen iiij daghen, ende quam t'Amersfoert ende dede haer offerhanden mit blijschappen.
225
Item het was een man van Scherpenzeel, ende was seer verveerlick geschoert geweest wel viij iaer. Hij loeffde zijn bevaert tot Maria in Amersfoert ende na x uren soe wert hij gesont ende geheelt sonder medicijnen off snieden. Hij quam t'Amersfoert mit zijn offerhande ende aenbadt die heijlighe maghet Maria.
226
Item het was een vrou van Nijenlanderen vuijt Vrieslandt. Soe wert haer huijs verbrant bij nacht. Als zij liep om hulp aen haer naeburen, om dat te slesschen ende vuijt te geten. Als zij weder quam, was dat huijs al ontsteecken. Soe wert zij denckende op haer kijndt, dat het noch in den brandt lach. Soe viel zij op haer knijen en loeffde dat kijndt te laten weghen voor Maria, vandt zijt levendich. Soe liep die vrou inden brandt ende socht dat kijndt inden brandt ongebrandt. Dan zijn haer was bezenghet op zijn hoeft, ende die vrou was onbequets vanden brandt, ende zij quam mitten kijnde ende liet het weghen voor Maria.
