MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
231
Item het was een vrou ende had een cleijn kijndt, dat zij vandt doot bij haer. Zij loeffden haer bevaert dat kijndt te doen weghen voor Maria t'Amersfoert, waert dat Maria hem leven verleenende. Over een ure soe ontwerpt dat kijndt ende zij quamen en deden haer bevaert, danckende Maria mit blijschappen.
232
Item het was een schipman van Campen, ende lach verveerlick en reedt aen zijn ancker. Ende sach dat daer vijff groete schepen verdorven bij hem. Hij loeffde zijn bevaert te gaen voor Marien beeldt, alsmense droech, op zijn hemde naeckt. Soe wert dat weer zeedich, ende quam zeedich ende geheel te lande. Ende hij dede zijn bevaert blijdelick.
233
Item het was een man van Montfoerde, ende had een groete zwelle in zijn mont, alzoe dat hij nijet rusten, eeten noch drincken en konste, alzoe dat hem geen meysters des zeers dorsten onderwijnden. Daer quam mede aen die kancker. Doe loeffden hij zijn bevaert t'Amersfoert mit offerhanden. Des nachts vandt hij op zijn bedde een harde steen vuijt zijn monde gegaen sonder pijnen. Ende te hant quam hij t'Amersfoert mit blijschappen en dede zijn bevaert mit groete offerhanden.
234
Item het was een schipman van Haerlem, beseeten mit veel vijanden vander hellen. Als die besweerre den duvelen dede spreecken ende nijet en const verhuesen overmits zijnre besweerijnghen, doe spraecken die goede mannen, die hem hielen: "Laet ons loven onse bevaert t'Amersfoert: desen beseten man te brenghen mit offerhanden voor Maria". Te hant bestont die man grouwelick te beren, ende te laeten, alzoe dat hij wert verlost van xxv vijanden, ende quam zeedich en wijs t'Amersfoert, ende deden haer bevaert blijdelick ende lieten hier haer ijseren banden.
