MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
234
Item het was een schipman van Haerlem, beseeten mit veel vijanden vander hellen. Als die besweerre den duvelen dede spreecken ende nijet en const verhuesen overmits zijnre besweerijnghen, doe spraecken die goede mannen, die hem hielen: “Laat ons loven onse bevaert t’ Amersfoert: desen beseten man te brenghen mit offerhanden voer Maria”. Te hant bestont die man grouwelick te beren, ende te laeten, alzoe dat hij wert verlost van xxv vijanden, ende quam zeedich ende wij t’ Amersfoert, ende deden haer bevaert blijdelick ende lieten hier haer ijseren banden.
235
Item het was een wijncoepman van Dordrecht, ende sprack spijttelick ende spottelick op die pilgroms, ende mede van Onse L. Vrouwen beeldt. Ende te hant daer nae wert hij alzoe beroeft zijnre sinnen ende lach een halff iaer rasende, gebonden mit ijseren. Als zijn vrienden loeffden hem daer te brenghen bevaert, soe wert hij bekennelick ende sprack: “O Maria, ick heb op U gesproecken. Dat vergeeft mij, ô Maria. Ick loeve u te versoecken mit schoende offerhanden.” Ende t’hant wert hij gesont ende zeedich, ende quam t’Amersfoert en brocht daer zijn banden en danckde Maria blijdelicken.
236
Item het was een schipman van Haerlem, ende lach in groeter anxt zijns lijffs ende scheeps, alzo dat hij nijet en wiste, dan te verdrencken. Alzoe dat hij met haest ende cracht den ancker wilden optrecken, well mit viij mannen. Die ancker en wolde nijet lichten, ende die wijnt quam soe verveerlick, dat zij alle te samen op haer knijen vielen ende loeffden te coemen t’Amersfoert bij Maria. Te hant bestont een man te trecken, ende zij wonden den ancker boven water. Ende quamen all te gader tot Maria mit blijdschappen en deden haer offerhanden.
