MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
236
Item het was een schipman van Haerlem, ende lach in groeter anxt zijns lijffs ende scheeps, alzo dat hij nijet en wiste, dan te verdrencken. Alzoe dat hij met haest ende cracht den ancker wilden optrecken, well mit viij mannen. Die ancker en wolde nijet lichten, ende die wijnt quam soe verveerlick, dat zij alle te samen op haer knijen vielen ende loeffden te coemen t’Amersfoert bij Maria. Te hant bestont een man te trecken, ende zij wonden den ancker boven water. Ende quamen all te gader tot Maria mit blijdschappen en deden haer offerhanden.
237
Item het was een vrou van Kenen in de Betouwe, ende was vuijt spielen gegaen, vuijt haeren huijs. Als zij t’huijs quam, soe vandt zij haer kijndt in een tobbe waters, staende op zijn hoeft. Zij nam dat kijndt mit tranen vuijt den water: cout, stijff ende als doot. Zij loeffde haer bedevaert mit groeten tranen ende pijn haers harten, dat kijndt te laten weghen. Een halff ure daer nae ontwerpt dat kijndt ende zij quamen mit groeter blijschappen en deden haer bevaert mit schoene offerhanden.
238
Item het was een maghet van vijfftien jaeren, Anno M ccc XLViij, woenende tot Brucken bij Boemel, ende wert te mael blijnt van hem selven mit zijn een oghe, mit groeter weenen, drie weecken lanck. Sich, haer vader ende moeder d’loeffden haer bedevaert mit haer dochter tot Onse Lieve Vrouwen tot Amersfoert,, ende zij wert binnen die tijt van drie daghen well sijende.
