MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
241
Item te Haerlem was een ionckgeselle die xvj jaeren beseten hadde geweest mit xvj vijanden. Ende mocht hem nijet verlossen, maer ten lesten, die leste vermaenijnghe sprack die boose gheest, dat men hem brenghen soude t’Amersfoert voer dat Marien beeldt, inden water gevonden. Ende terstont als die moeder dat geloeft hadde, wert hij verlost ende heeft zijn bedevaert mit zijn moeder gedaen des Donredaechs voer Sint Jans avont middesoemer.
242
Item het was een man Haerlem, die had een wijff, die beseten was vanden vijant der hellen, x jaer lanck. Ende zij wert belesen op S. Odulphus dach. Doe zij belesen was, wert zij cranck, alzo datmen niet en wiste, dan zij sterven soude. Ende haer openbaerde Onse L. Vrou, dat zij tot haer coemen sou, eer zij sterven soude. Ende het quam haer weder aen op S.Peter ende S. Pouwels dach, dat zij weder gequelt wert vanden vijandt, azloe dat die viandt, die sprack en seijde, dat hij nijet rumenen woude, off vuijt haer blijven soude, zij hadde haer bevaert gedaen tot Onse L. vrou t’Amesfoert. Ende zij heeft haer bevaert gedaen. Ende zij wert verlost.
243
Item het was een man van Wagenijnghen, die zeer geschuert was aen beijde zijden, mit groeter zeert, xv iaeren lanck. Ende hij loeffde zijn bevaert tot Onse L. Vrou t’Amersfoert mit schreijende oghen. Ende hij wert terstont gesont, des Godt gelovet moet wesen ende Onse L. Vrou.
244
Item inden selven jaeren was een ionghe maghet van xviij jaeren, woenende t’Eemden in Vrieslandt, en voel van die solder neder op den anderen, soe dat zij voer doot bleeff legghen van X uren tot X uren. Ende soe vroech als haer vrieden geloeft hadden haer te weghen mit wijn ende mit weyt, soe ontspranck zij ende bequam, want dat bloet terstont inder valle quam ten ooren vuijt. Ende zij heeft haer bevaert gedaen saterdachs voer S. Jacob tot Maria hier. Anno Mccc xLviij op den xxx Augusti.
