MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
246
Item het was een stuerman van Amsterdam, die mit gesellen onder Vlaenderen des Dijnsdaechs nae S. Catharina dach waren in groeter noedt,. Ende anders nijet en saghen dan dat schip terstont te breecken, want bij hem brack een schip, well van cc last. Ende dat volck daer mede verdranck. Ende zij loeffden haer bevaert voer Onse L. Vrou, die inden water gevonden was, mit een wasschen schip. Ende terstont soe chregen zij genade ende troest ende behouden vuijt alle noodt. Ende die stuerman dede zijn bevaert des Dijnsdaechs nae Onse L. Vrouw conceptionis dach. Anno Domini M.cccXKLViij.
247
Item het waren vijff mannen in groeter waters noodt onder Noorweghen onder die clippen mit groter sturmen. Ende zij loeffden haer bevaert voer Onse Lieve Vrouwen beeldt. Ende zij werden verlost, ende hebben haer bevaert gedaen.
248
Item int jear voerseijt, in die quatertempers voer Karsmis, verdrenckte een kijndt toe Scherpenzeel in een bijte ijes. En die olders wonnent daer vuijt. Ende het lach een vierdel van een ure voer doot. Ende zij loeffden haer bevaert te doen mit den kijnde te weghen voer Onse L. Vrouwen beelde t’Amersfoert. Ende dat kijnt wert weder levendich, ende zij hebben haer bevaert gedaen.
249
Item Anno M ccc XLIX quam een schipman van Brouwers haven, die lang in zijnre zijden een maniert van een langwerpende steen, die bijkants vij loet of meer woech, gedragen had. Soe dat dese steen mit een swerijnghe vuyt zijne villingen binnen die lijesschen sich openbaerde. Doe loeffde hij zijn bevaert te doen voer Onse L. Vrou t’Aersfoert mit zijn offerhanden. En desen man hevet den selven steen gebrocht voer Onse L. Vrou en gelaten, die meinnich mannen ende vrouwen gesien hebben openbaerlick.
