MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
251
Item te Ravezwa, voer middelwijnter, is geweest een maghet van vij jaeren, die toe gesproecken is, ende vervaert. End eis all naeckt in die Lecke gesprongen, end eis daer een halff ure lanck in geweest. Ende drie mannen van u\Utrecht hoerden in d’Lecke dat geruft, ende zijn tot des maghet vaders huijs aengeroepen. Ende die iij mannen en die vader loeffden haer bevaert tot Onse L. Vrou t’Amersfoert. Ende zij hebben d’maghet mit lederen ende mit stocken vuijt gechregen. Ende die maghet loeffden haer selver. Ende zij hebben haer bevaert gedaen.
252
Item tot Schedam was een kijndt van iij jaeren, dat iij daghen geen water maecken en konde vanden steen in zijn schafken. Doe loeffden die ouders haer bevaert tot Onse L. Vrouwen t’Amersfoert, ende terstont maecktent zijn water. Ende zij hebben mit t’kijnde voerseijt haer bevaert gedaen.
253 Item inden selven jaere was een schipman vander Sluijs, die mits es schepen tot hem inder zee int raest, dat seer sorghelick stont mit hem allen aen lijff, en goet en schip. Ende heeft vuijt devotien tot Onse L. Vrouwen geloeft ses pont wasch aen schepe, aen beeldt. Ende terstont hebben zij die haven gechregen ende vuijt die last gecoemen ende zijn bevaert gedaen.
254
Item inden selven jaere was een knecht van xv jaeren die zijnre sinnen alzo beroeft was, als dat xx mannen hem nauwe vellen en mochten. Soe mosten zij den voerseijden knecht in een wanne bevallen ende soe zijn handen ende voeten inden ijser sluijten. Ende hij wert te Alcmaer belesen, alsmen die beseten kuden plach te belesen. Alzoe quam dese knecht selver in zijn sinne, als dat hij hem geloeffde voer Onse L. Vrouwen beeldt t’Amersfoert, inden water gevonden, een waschkeers van iij pont te brengen. Ende zijn vrienden daer in verwonderden. Ende soe vroech als hijt geloeft hadde, ontghingen die ijsere banden bij hem selven, ende hij heeft zijn bevaert gedaen des Dijnsdaechs nae Sint Scholastica dach.
