MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
254
Item inden selven jaere was een knecht van xv jaeren die zijnre sinnen alzo beroeft was, als dat xx mannen hem nauwe vellen en mochten. Soe mosten zij den voerseijden knecht in een wanne bevallen ende soe zijn handen ende voeten inden ijser sluijten. Ende hij wert te Alcmaer belesen, alsmen die beseten kuden plach te belesen. Alzoe quam dese knecht selver in zijn sinne, als dat hij hem geloeffde voer Onse L. Vrouwen beeldt t’Amersfoert, inden water gevonden, een waschkeers van iij pont te brengen. Ende zijn vrienden daer in verwonderden. Ende soe vroech als hijt geloeft hadde, ontghingen die ijsere banden bij hem selven, ende hij heeft zijn bevaert gedaen des Dijnsdaechs nae Sint Scholastica dach.
255
Item inden selven jaer voerseijt quam een vrouken varen van Colln tot Nijmmeghen. Ende haer dochter van ij jaeren viel int water ende verdronck. Doe riep die moeder aen Onse L. Vrouwen beeldt t’Amerfoert inden water gevonden. Ende loeffde dat kijnt mit wijn ende weijt daer te weghen, soe verre als dat kijndt te leven weder quame. Ende als het ij uren gedrencket hadde geweest ende zij haer bevaert doe geloeft hadde, soe wert dat maeijsken weder levende. Ende terstont quam die moeder mit den kijnde en volbracht haer bevaert des Woensdachs nae S. Scholastica dach.
256
Item Anno M ccc XLIX was een arm vrouken te Dordrecht en had een zeer been, soe dat zij ij jaeren droech ende geen meijster mocht haer genesen. Ende lach daer aen kranck, soe datmense mit een slaeplaecken most om keeren. Ende men meenden, datmen haer dat been off soude hebben gezaget. Maer zij loeffden Onse L. Vrou t’Amersfoert, inden water gevonden, ende terstont soe wert zij slapen ij daghen lanck. Ende daer nae wert zij gaende. Ende dede haer bevaert mit een wasschen been, als zij geloeft hadde.
