MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
256
Item Anno M ccc XLIX was een arm vrouken te Dordrecht en had een zeer been, soe dat zij ij jaeren droech ende geen meijster mocht haer genesen. Ende lach daer aen kranck, soe datmense mit een slaeplaecken most om keeren. Ende men meenden, datmen haer dat been off soude hebben gezaget. Maer zij loeffden Onse L. Vrou t’Amersfoert, inden water gevonden, ende terstont soe wert zij slapen ij daghen lanck. Ende daer nae wert zij gaende. Ende dede haer bevaert mit een wasschen been, als zij geloeft hadde.
257
Item inden selven jaere quam een man vander Goude, die vijff jaer geschuert had geweest swaerlick. Ende most een kusken gespannen dragen op die bruecke. Dese voerseijde man quam in zijn sinne, dat hij soude love, wollen en bervoets, Onse L. Vrouwen beeldt tot Amersfoert inden water gevonden, mit een wasschen keerse ende zijn offer daer te brengen. Ende altehant vandt hij hem gesont vander bruecke. Ende hij dede zijn bevaert, als hij geloeft had op den groten vastelavont. Ende offerde Onse Lieve Vrouwe zijn bandt tot een waerachtich teijken des gesontheijts.
258
Item inden jaer Mcccc xLviij (1448) was een vrouwken op den h. Karsavont toe Groenijnghen vol nae vuijt haren memorien van grote pijne haers hoeffs: Ende die bij haer riepen aen Onse L. Vrou voerseijt ende loeffden een wasschen hoeft haer te offeren t’Amersfoert.Ende zij wert gesont.
259
Item deze vrou voerseijt wert daer nae blijnt, Ende zij geloeffde Onse Lieve Vrouwe te versuecken mit een wasschen keersse. Ende zij wert weder siende. Ende zij heeft haer offerhande Onse Lieve Vrou gebrocht.
