MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
261
Item inden selven jaere quam een coepman varen mit een schip weijts tusschen Vlaenderen ende Zeelandt. Ende ten stormenden noch ten waeijden nijet, maer dat schip alleijnskens nam water in ende begon te sijncken. Ende zij en conden geen gat daer aen vijnden. Ende als zij oosden off rusten, soe bleeft all in een punte. Ende als zij in deser grote vresen waren, soe loeffde die coepman Onser L. Vrou t’Amersfoert te versuecken mit een waskeers van een pont ende een silveren beeldt. Ende altehant soe quamen zij te lande, gans ende geheel. En dese coepman heeft zijn bevaert volbracht des Maenendachs nae reminiscere.
262
Item inden selven jaere des Dijnsdaechs voer vastelavont voren iiij schipmannen vander Sluijs tot der Nijepoert toe ende voer der Nijepoert stack een grote sturm aen, alzo dat zij haer ancker worpen in dat water. Ende reeden soe in dien groten sturm alle den nacht op den cleynen ancker nauwe soe dick alsmen mit der hant beluken mocht. Ende als zij in deser groeter noodt waren, ende haren doot voor die oghen sagen, zoe loeffden zij haer bevaert Onser L. Vrou altesamen te versoecken. En des smorgens quamen zij behouden in die haven. Ende hebben haer bevaert gedaen op S. Gregorius avont.
263
Item het was een wijff van Utrecht. Die gaff haer kijnderen eeten, ende dat kijndt schoet een stuck broets in zijn keel, alzo dattet terstont doot bleef. Ende zij stack mit haer vijnger in zijn keel, ten halp nijet. Ende doe loeffde zij haer bevaert tot Onse L. Vrou t’Amersfoert dat kijndt te weghen mit wijn ende weijt. Terstont spranck dat broet vuijt zijn keel ende dat kijnt wert weder levendich.
