MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
263
Item het was een wijff van Utrecht. Die gaff haer kijnderen eeten, ende dat kijndt schoet een stuck broets in zijn keel, alzo dattet terstont doot bleef. Ende zij stack mit haer vijnger in zijn keel, ten halp nijet. Ende doe loeffde zij haer bevaert tot Onse L. Vrou t’Amersfoert dat kijndt te weghen mit wijn ende weijt. Terstont spranck dat broet vuijt zijn keel ende dat kijnt wert weder levendich.
264
Item het was een kijndt van Rumelaer van ij jaeren, dat was gedrencket in een put, alsoe dat daer geen leve inne en was. Doe loeffden zij haer bevaert tot Onse L. Vrouwe t’Amersfoert dat kijndt te weghen mit wijn ende mit weijt. Terstont wert dat kindt levendich. Ende zij hebben haer bevaert gedaen mit haer vijften, wollen en bervoets.
265
Item het waren viij mannen in een boodt in die bedervijnghe nu laets geschiet, also dat dat boodt in die gront schioert. Doe vielen die viij mannen op dat verdeckt. Ende zij loeffden haer bevaert tot Onse L. Vrou t’Amersfoert. Ende zij sijnt gesont te lande gecomen. Item op dit voerseijde te bet geloeven is, soe heeft een van dien voerseijden een trouwe geoffert, daer dat verdeckt mede gebonden was.
266
Item het was een man van Gruonijnghen, die verleemt was aen zijn beenen een halff jaer. Ende hij loeffde zijn bevaert tot Onse L. Vrou t'Amersfoert te versoecken. Ende doe hij tot Campen quam op die brugge, doe nam hij zijn krucken op zijn hals ende was gesont. Ende hij dede zijn bevaert ende seijde het ons selver.
