MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
266
Item het was een man van Gruonijnghen, die verleemt was aen zijn beenen een halff jaer. Ende hij loeffde zijn bevaert tot Onse L. Vrou t'Amersfoert te versoecken. Ende doe hij tot Campen quam op die brugge, doe nam hij zijn krucken op zijn hals ende was gesont. Ende hij dede zijn bevaert ende seijde het ons selver.
267
Item een man is gecoemen op een water, Len geheeten, daer hij inden ijesse brack ende bleeff hangen lange tijt op zijn pijck. Ende en conde hem selven nijet helpen. Dese heeft zijn bedevaert geloeft Onse L. Vrou t'Amersfoert vuijt raedt anderen luijden, die daer bij waren ende hem niet helpen en conden. Te hant heeft hij als een post onder zijn voeten gevoelt ende is gevrijt vanden perikel. Ende is gecoemen ende heeft zijn bevaert gedaen.
268
Item een vrou van Groenijnghen had ij beenen vanden knije voert nederwaerts altemael blau en swert ontsteecken vanden vuijer. Dese hevet haer bevaert geloeft Onse L. Vrou t'Amersfoert ende is gesont geworden.
269
Item ij mannen gevangen ter Goude, die een sittende in die stock, die ander mit zijn voeten gesloeten in een stercke ijseren bout. Dese hebben genade gesocht aen Onse L.Vrou t'Amersfoert ende overmits haer gracie zijnt zij gevrijet vuijter gevanckenisse. En haer bevaert gedaen t'Amersfoert, danckende Maria
