MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
270
Item het was een man van Groenijnghen, welck van zijn vrienden vijfftalff ure lanck, vermits groete cranckheijt, als voor doot geholden wort. Ende als zij opset maeckten mit malcanderen, off hij weder quaem tot hem selven, dat zij hem toeherden solden zijn bevaert te doen tot Onse L.Vrout'Amersfoert mit een pont waschs. Ende te hant heeft Maria ghenade aen deze ziecken bewesen. Ende is haestelicken opgestanden vander sieckte, gaende ende lopende waer hij woude. Ende is gecoemen en heeft zijn bevaert gedaen devotelicken mit grote danckbaerheijt.
271
Item het was een wijff van Luybeech, die was iij iaer vercruepelt, soe dat zij op krucken reet. Doe loeffde zij t'Amersfoert Onse L.Vrou te versuecken mit een pont wasch. Doe wert zij rechtevoert gesont en heeft haer bevaert gedaen op Paes avont.
272
Item binnen Groenijnghen was een maghet, die bij gevall, als zij water soude putten in die putte viel. Ende was daer inne iij uren lanck, ende wert daer vuijt-
getogen voer doot. Ende lach alzo iij daghen. Daer nae loeffden haer vrienden bevaert mit haer tot Onse L.Vrouwen t'Amersfoert te versuecken. Ende die selffde maghet mit wijn ende mit weijt op te weghen. Ende alzo gerijnghe, als zij dat geloeft hadden, soe wert zij spreeckende. Ende daer quam veel waters ter keelen vuijt loopen. Ende dese voerseijde maghet is selver tot Onse L.Vrou t'Amersfoert geweest des Donredaechs nae Paesschen ende heeft haer bevaert gedaen ende heeft een brieff vanden cureijt van Groenijnghen mit zijn segel besegelt gebracht, dat dit aldus geschiet is.
