MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
272
Item binnen Groenijnghen was een maghet, die bij gevall, als zij water soude putten in die putte viel. Ende was daer inne iij uren lanck, ende wert daer vuijt-
getogen voer doot. Ende lach alzo iij daghen. Daer nae loeffden haer vrienden bevaert mit haer tot Onse L.Vrouwen t'Amersfoert te versuecken. Ende die selffde maghet mit wijn ende mit weijt op te weghen. Ende alzo gerijnghe, als zij dat geloeft hadden, soe wert zij spreeckende. Ende daer quam veel waters ter keelen vuijt loopen. Ende dese voerseijde maghet is selver tot Onse L.Vrou t'Amersfoert geweest des Donredaechs nae Paesschen ende heeft haer bevaert gedaen ende heeft een brieff vanden cureijt van Groenijnghen mit zijn segel besegelt gebracht, dat dit aldus geschiet is.
273
Item het was een vrou van Seevelt, swaer mit kijnde, wonderlicke cranck.
Ende als men seecker en gewaer getuijcht hadt, als dat die vrucht ses weecken doot geweest had ende dat vroucken oock daer toe dat lijff schieten most, soe hevet zij mit haeren buren haer bevaert geloefft tot Onser L.Vrouwen t'Amersfoert. Ende siet, mit haestelicken scheijden zij vanden doden kijnde ende vermits gratien Mariae is zij gesont gemaeckt en heeft haer bevaert volbracht.
274
Item het was een maecht van iij jaeren tot Haerlem, ende was langer dan ij uren doot. Ende die ouders loeffden haer bevaert tot Onse L.Vrou t'Amersfoert. Ende t'kijndt wert weder levendich.
