MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
299
Item het was een man vuijt Waterlandt seer iammerlicken beseten ende gequelt vanden vijandt, datmen zijn verdriet nijet te vollen vuijtspreecken noch schrijven mach, alzo hij mij selffs geseijt heeft, doe ick dit geschreven hebbe. Ende hij wert gebrocht voer Onser L. Vrouwen t’ Amersfoert, gebonden mit iij banden, doe hij int schip was. Een aen zijn voeten ende dat waren ijseren banden. Die ander aen zijn handen.En daer toe was hij gebonden int middel van zijn lijve an dat schip. Ende zij en konden hem nauwelicxs houden. En doe zij aen quamen, doe ghijngen zijn vrienden, die hem leijden, te samen bervoets. En doe hij voer Onse L. Vrou quam, ende een weinich daer voer geweest had, begeert hij sel ver, dat men zijn banden ontbijnden souden. Ende hem een priester seijnden en woude biechten. Ende was gelijck gesont geworden ende verlost, als die wel kendich is, die zijn biecht hoerden. Ende heeft dit selver geschreven. Ende is des anderen daghes weder gecoemen ne heeft selver die sware boeijen gebricht en gelaten tot een getuijch des mirakels. Ende heeft Onse L. Vrou gedanckt en geloeft.
300
Item het waren iij mannen vuijt Engelandt gevangen te Harderwijck. En saten in die gesloten en waren xxj weecken sonder troest, soe dat zij ten lesten aenriepen die troesterin Maria ende baden haer om hulp ende troest. En loeffden haer t’Amersfoert te versuecken, konden zij verlost worden. Rechtevoert soe haelden zij haer voeten alle drie te gader vuijt den stock ende die stock bleeff gesloten. Ende zij ghijngen door iij doren en quamen vuijt d’stadt Harderwijck. Ende zij en wisten niet, hoe zij vuijt quamen. En quamen t’ Amersfoert ende deden haer bevaert. Ende hebben dit selver geseijt voer Onse L. Vrou. Ende cortelick daer nae quam die stockmeijster en vervolchdense en seijde oock dat zij mirakelick ontgaen waren, gelijck zij oock geseyt hadden. Laet ons bidden Mariam.
