MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
300
Item het waren iij mannen vuijt Engelandt gevangen te Harderwijck. En saten in die gesloten en waren xxj weecken sonder troest, soe dat zij ten lesten aenriepen die troesterin Maria ende baden haer om hulp ende troest. En loeffden haer t’Amersfoert te versuecken, konden zij verlost worden. Rechtevoert soe haelden zij haer voeten alle drie te gader vuijt den stock ende die stock bleeff gesloten. Ende zij ghijngen door iij doren en quamen vuijt d’stadt Harderwijck. Ende zij en wisten niet, hoe zij vuijt quamen. En quamen t’ Amersfoert ende deden haer bevaert. Ende hebben dit selver geseijt voer Onse L. Vrou. Ende cortelick daer nae quam die stockmeijster en vervolchdense en seijde oock dat zij mirakelick ontgaen waren, gelijck zij oock geseyt hadden. Laet ons bidden Mariam.
301
Item het was een man van Haerlem, die ghijnck te Campen op die brugge en wert daer blijnt, soe dat hij van die brug nijet gaen en konde, dan wert daer off geleijt. Ende was daer seer droewich en mistroestich, Ende hij riep aen die moeder der geenre, die de blijnden mit een woerdt op doen kan haer ooghen. Ende heeft zijn bevaert geloeft totter Moeder ons heeren te versuecken tot Amersfoert. Ende hij wert reckeloes siende. Ende hij is gecoemen voer Onser Vrouwen als hij geloeft hadde en heeft zijn offerhande gebrcht en heeft Onser Vrouwen seer gedanckt. Laet ons die goedertieren moeder ende maghet dancken t’allen tijden.
302
Item het was eebn man Groenijngen, die was geheel blijnt. Die quam inden Brijel. Daer wert hem van een anderen blijnden, die hem kende, en seyde; dat hij moert gedaen hadde ende hij wert gevangen. En daer hij lach in die vanckenis, loeffde hij zijn bevaert tot Onser L. Vrouwen t’Amersfoert ende hij bad, dat zij hem helpen Woude., dat hij soe nijet sonder schult geschoffeert en worde. Ende als hij dat geloeft hadde, ende g3ebden, soe ghijnck hij nae die dore ende hij vant se open staen. Ende clam neder ende gijnck soe blijnt als hij was op dat kerckhoff sondr stock off leysman, anders dan Onser L. Vrou, die hem leijde sonder stoten off seer doen, dat hij vrij op dat kerckhoff quam.
