MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
303
Item het geschiedde te Bambrug in die parochie van Apcou, dat die moeder van een kijnde ghijnck vuijt den huijs en liet dat kijndt alleen in huijs. En te hant is dat kijndt vuijt gegan ende viel in een sloet. Als d’moeder thuijsquam, vindt zij dat kijndt nijet. Ende nae dat zij het veel ende lange gesocht had, soe vandt zijt leggen in een sloet. Ende zij haeldet vuijt, ende vandt het doot. Ende zij seer qualicken te vreeden en clagende seer iamerlicken, soe dat die geen, die daer bij waren, seijden haer, dat zij haer bevaert loven sioude tot Ons L. Vrou t’Amersfoert. Ende zij zijnt op haer knijen gevallen en hebben haer bevaert geloeft. En rechtvoert soe roerde hem dat kijnt. Ende die moeder, vader ende buerluijden, die dat geloeft hadden, zijnt gecomen mitten kijnde en hebben haer bevaert gedaen.
304
Item in Diewers was een paer volcxs, die hadden een kijndt dat ij off iij lopende garen had aen zijn einde, die niemant geheelen en konde, off zij braecken altijt weder op, soe dat die ouders daerom seer rouwich waren, om dat zij geen troest en konden chriegen van geenen menschen tot des kijnts behoeff. Ende zij hebben Onse L. Vrou t’Amersfoert aengeroepen ende haer bevaert geloeft. Ende dat kijnt wert gesont ende bleeff gesont. Ende zij hebben hier haer bevaert gedaen mitten kijne., als ij geloeft hadde.
305
Item bij Gorkum was een kijndt verloren van zijn ouders wel ij uren lanck, dattet die ouders sochten, soe dat zijt ten lesten vonden liggen in die Ghijsel, ende was geheel gedrenckt. Ende als mijn die vader vanden kijnde selffs seijde, soe wast all stijff was soe well anderhalff ure. Ende alsoe als die vader ende moeder seer rouwich waren, soe hebben zij die troesterinne Mariam aengeroepen ende hebben haer bevaert geloeft tot Onse L. Vrou t’Amersfoert. En rechtevoert wert dat kijndt schrijende en levende. Ende die ouders hebben haer bevaert mitten kijnde gedaen ende hebben dit selver tot Onser L. Vrouwen eere vertelt.
