MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
306
Item het quam een man voer Onser L. Vrouwen, en seijde, dat hij hem selven in zijn knije gehouden had mit een bijel, soe dat hij om dat been nijet gaen off staen en konde, dan mit ij krucken. Ende hij noch die meijsters, die daer over ghijngen, en wisten anders nijet, dan dat hij lam blijven soude mit dat been. Ende hij heeft Mariam aengeroepen en heeft zijn bevaert geloeft t’Amersfoert. Ende huij wert cortelick gesont ende heeft zijn bevaert gedaen en zijn krucken hier gelaten.
307
Item het was kijndeken seer gebroecken ende geschuert, soe datmen daer geen raedt toe vijnden en konde des gesontheijts. En daerom soe hebben begheert d’ouders troest van boven ende hebben aengeroepen Maria en haer bevaert geloeft ende dat kijndt is kortelick genesen. Ende zij hebben die banden hier gelaten, daer dat kijndt mede gebonden had geweest, tot een teijken des waerheijts.
308
Item het was een wijff te Apcou, die had gebreck in haer mont, soe dat zij in een wijel tijts nijet spreecken en konde ende oock soe was haer de tonge soe verheven, dat zij qualicken eeten off drincken konde. Ende zij seijde, dat zij daer mede toe meijsteren ghijnge. Ende doe zij geen baet chriegen en konde, riep zij Onse L. Vrou aen. Ende rechtevoert voelden zij baet. Ende zij heeft haer bevaert gedaen.
