MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
308
Item het was een wijff te Apcou, die had gebreck in haer mont, soe dat zij in een wijel tijts nijet spreecken en konde ende oock soe was haer de tonge soe verheven, dat zij qualicken eeten off drincken konde. Ende zij seijde, dat zij daer mede toe meijsteren ghijnge. Ende doe zij geen baet chriegen en konde, riep zij Onse L. Vrou aen. Ende rechtevoert voelden zij baet. Ende zij heeft haer bevaert gedaen.
309
Item het was een man bij Schoenhoven, d’soude in een water swemmen. Ende hij had een speld in zijn mont. Ende als hij in dat water spranck, soe was dat water dieper als hij meende ende vergat die speld, die hij in zijn mont had, soe dat d’speld in zijn keel ende was wel ij off iij atmael in zijn keel, dat hij luttel off nijet eeten off drincken mocht ende oock soe mocht hij zijn hals nijet keeren. Ende doen hij geen hulp op der aerden vijnden en conde, riep hij Onse L. Vrou aen en loeffde zijn bevaert t’Amersfoert. Ende rechtevoert schoet die speld vuijt zijn keel ende schoet in zijn lichaem, soe dat hem doe in zijn lichaem veel bloets beneden off ghijnck. Ende hij riep weder Onse L. Vrou aen, als hij gedaen had. Ende doe ghijnck hem die speld beneden off ende hij heeft zijn bevaert gedaen ende een silveren speld mit ander offerhande Onse l. Vrou geoffert.
310
Item het was een man groeter zieckten cruepel geworden, soe dat hijop ij krucken moste gaen. En doe hem niemant konde gesont maecken, soe heeft hij zijn bevaert tot Onse L. Vrouwe t’Amersfoert geloeft, ende hij iis gesont geworden ende heeft zijn krucken hier gelaten.
