MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
324
Item het was een schaepharde ende quam t’Amersfoert tot Onser L. Vrouwen en seijde, hoe dat hem onversienlick zijn mont slim toech besiden aen zijn wanghen. Ende hij loeffde zijn bevaert tot Onse L. Vrou t’Amersfoert ende zijn mont wert roekeloos weder gesont.
325
Item het was een man vuijt Zeelandt, ende was blijnt geworden. Ende was well een maent, dat hij luttel of niet. Dien quammet des nachts in zijn sinnen, gelijck off hem toe gerproecken had geworden, dat hij Onse L. vrou t’Amersfoert soude versoecken. En rechtevoert loeffde hij zijn bevaert, ende des smorgens, als hij opstonde, voelde hij baet. Ende hij wert siende, ende heeft zijn bevaert gedaen.
326
Item daer quam een man vuijt Vrieslandt en seijde, hoe dat hij IX jaeren stom geweest hadde. Ende hij loeffde Onse L. Vrou t’Amersfoert te versoecken end ehij wert spreeckende ende heeft zijn bevaert gedaen ende dit selffs geseijt.
327
Item daer quam een vrou vuijt Zeelandt en had drie daghen ende drie nachten in grooten swaren arbeijt van kijnde geweest soe dat haer docht, dat zij qualick vanden kijnde verscheijden kondt. Ende zij geloeffde Onse L. Vrou t’Amersfoert te versoecken. Alzoe vroech als zij dat geloeft hadde, doe verscheijde zij vanden kijnde.
