MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
331
Item het was een knechtgens tot Enss van elff jaeren ende viel vuijt een schuijt in die zee ende was verdrenckt. En d’buren voeren vuijt en visschendet ende brochtent die moeder. Ende zij loeffden haer bevaert tot Onse L. Vrou t’Amersfoert, ende het wert weder levende. Ende zij quamen hier en deden haer bevaert.
332
Item het was een vrou te Dockem, en had een voll wassen dochter, die ziij open gater had. Ende en vonden nergens geen meijsters, die haer helpen konden. Heeftse aengeroepen die maghet Maria om hulp ende troest. Ende heeft haer bevaert voor Onse L. Vrou t’Amersfoert geloeft. Ende zij wert gesont ende quam en dede haer bevaert.
333
Item het was een man vuijt Vlaenderen d’hadde een zuijckt onder zijn leden ende hem conde niemant helpen. Hij loeffde Onse L. Vrou hier te versoecken ende een ijseren bandt om zijn hals te draghen tot dier tijt toe, dat Onse L. Vrou haer barmharticheijt aen hem thoenen woude. Ende hij wert gesont en quam hier en offerden d’ijseren bandt en dede zijn bevaert.
334
Item het was een vrou en was beseten, ende wert gebrocht voer Onse L. Vrou all bijsinnich, ende wert pruessende en karende ende gaff over. Ende wert wederomme gebrocht in haer herberghe. Des anderen daghes quam zij weder voor dat beeldt van Onser Vrouwen ende danckte ende loeffde die H. Maghet Maria. Ende hoepte dat zij verlosset was. Ende offerde haer gordel ter weerdicheijt, op dat zij nemmermeer van den boosen gheest gequelt soude werden. Ende scheijde gesont van desen, danckende God ende Maria.
