MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
334
Item het was een vrou en was beseten, ende wert gebrocht voer Onse L. Vrou all bijsinnich, ende wert pruessende en karende ende gaff over. Ende wert wederomme gebrocht in haer herberghe. Des anderen daghes quam zij weder voor dat beeldt van Onser Vrouwen ende danckte ende loeffde die H. Maghet Maria. Ende hoepte dat zij verlosset was. Ende offerde haer gordel ter weerdicheijt, op dat zij nemmermeer van den boosen gheest gequelt soude werden. Ende scheijde gesont van desen, danckende God ende Maria.
335
Item het was een man van Deventer, en had een kijndt, dat was geschuert ende hij sochte raedt aen d’meijsters, maer ten holp hem niet. Hij loeffde zijn bevaert voer Onse L. Vrouwen beeldt t’Amersfoert, en het kijndt te weghen mit wijn ende mit weijt. Ende dat kijndt wert gesont. Ende die vader quam en dede zijn bevaert.
336
Item het was een kijndt te Leent bij Nijmmeghen verdroncken des Dijndeachs nae midtvasten omtrint een ure. Doe d’vader dat kijndt vonde, loeffde hij dat kijnt tot Onse L. Vrou t’Amersfoert te weghen mit wijn ende mit weijt, mit gout ende mit silver ende die naeste vaert. Ende doe wert dat kijndt levende. Des anderen daghes nae die middach heeft dat kijndt in den bedde geleden, vuijtsteeckende hier en daer zijn armen soe dat d’moeder anxt hadde, dat dat kijnt vervriesen soude, alst cranck was, hebben zij dat kijndt zijn hemde aengedaen. Doe dat kijndt dat hemde aen hadde, beerden dat kijndt, oft beseten had geweest. Ende dat duerden van naer den middich tent omtrent tien off elff uren inder nacht. Doe seijde een vroutgen van den naeburen, datmen dat hemde weder vuijt doen soude ende loven dat hemde mede te offeren. Ende in die processie mede te gaen in linnen clederen. Doe dat d’ouders dus deden, is dat kijndt terstont rustende geworden, ende heeft geslapen, gegeten ende gedroncken. Ende heeft zijn zijn bevaert gedaen. Ende zijn ouders, als zij geloeft hadden en schildich wearen, danckende God ende Maria.
