MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
337
Item het was een maghet van Rijswijck gevangen in die Betuwe op een slot, geheeten terLeede, als van moertbrandt. Doe zij well een maent daer geseten had in een diepe kercker ende in eenen nieuwen vasten stock , doe soutmense pijnighen. Ende brocht ene pan mit coolen ende olije om mede te pijnighen. Zij riep aen Onse L. Vrou t’Amersfoert. Ende dat vueir ende olije ghijnck drie werff vuijt, alzo dat zij d’maghet weder in slooten ende meendense des andren daghes te pijnighen. Doe sprack zij: “Ghij en sult geen wille over mij hebben.”Ende leijde haer handen driewerff op die stock ende die stock spranck driefwerff op. Als dat die Aptman sach, wert hij schreijende ende lietse quijt om Onser L. Vrouwen wille. Ende zij heeft haer bevaert hier mit een wassen stock gedaen.
338
Item het was een man vuijt Westphalen gevangen bij Bokel van diefften. Ende zij wouden hem hangen. Hij riep aen Onse L. Vrouwe ende loeffdese t’Amersfoert te versuecken. Doe quam hij vuijt die toorn ende is voert vuijter stadt gegaen. Te hant sochten hem die luijden ende hij schoel heijmelick in een kuijle. Daer bestont het te snieuwen licht een vijnger diep, maer op deze man snieudent soe neer, dat hij lach een dach, ende een nacht onder die snee, datmen hem nijet vijnden en konde. Ende hij stojnt op ende is hier gecoemen ende dede zijn bevaert.
339
Item het was een schipman, die quam zeijlen in de Spaensche zee van Sint Jacob, daer hem een groote sturm aenstack, alzoe dattet schip schuerde. Hij loeffde zijn bevaert tot Onse L. Vrouwen t’Amersfoert, die haer beeldt inden water gevonden is. Ende overmits hulpe Onser L. Vrou, seijlde hij noch well hondert mijlen, want hij aen een schip quam, daer zij innen ghijngen. Ende zij quamen behouden ten lande. Ende die schipman is corts hier nae gecoemen in zijn bloote hemde ende bervoets ende heeft zijn bedevaert gedaen.
