MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
339
Item het was een schipman, die quam zeijlen in de Spaensche zee van Sint Jacob, daer hem een groote sturm aenstack, alzoe dattet schip schuerde. Hij loeffde zijn bevaert tot Onse L. Vrouwen t’Amersfoert, die haer beeldt inden water gevonden is. Ende overmits hulpe Onser L. Vrou, seijlde hij noch well hondert mijlen, want hij aen een schip quam, daer zij innen ghijngen. Ende zij quamen behouden ten lande. Ende die schipman is corts hier nae gecoemen in zijn bloote hemde ende bervoets ende heeft zijn bedevaert gedaen.
340
Item het was een man van Deventer, die groote pijne creech in zijn rechter arm. Ende als hem die pijn off ghijnck, bleeff zijn arm doeff ende sonder gevoelen, alzo dat hij in vijff maenden zijn handt op zijn borst nijet en konde geleggen. Doe loeffde hij zijn bevaert tot Onser L. Vrouwen t’Amersfoert. Ende als hij zijn bevaert daer dede, eijschede hij een kaersse ende namse in zijn ongesonde handt. Ende te hant is zijn arm mitter handt gesont ende geheel geworden voer Onse L. Vrou ende ghijnck gesont t’huijs.
341
Item het was een maghet bij Leijden bijster haerder sinnen geworden, die tot vier steden geweghen wert, ende haer nijet en halp. Zij loeffde haer bevaert tot Onse L. Vrou t’Amersfoert ende zij is weder verstandel geworden en gesont.
342
Item twas een man van Borckel, die stom weert well vijff daghen lanck. Hij loeffde zijn bevaert tot Onser L. Vrouwen ende binnen een ure daer nae wert hij spreeckende ende gesont.
