MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
354
Item het was een schipman van Bunschoten, die opte Suer zee quam mit een schip geladen mit turff. Daer quam hem een sturm teghen en werpt zijn schip op die zijde, alzo dat zijn turff ende all zijn have vuijt dat schip viel. Ende die een knecht lach omtrent een halff ure onder dat schip. Sich, dat schip sloech weder op die ander zijde, alzoe dat die ander opt boert vanden schepe hijnck ende dochte nijet dan mede te drencken. Des bedacht hij hem ende loeffde zijn bevaert tot Onse L. Vrouwe t’ Amersfoert, die haer beeldt inden water gevonden was. Te hant sloech dat schip wederomme mit zijn mast recht op ende het ancker viel bij hem vuijt. Ende zij knecht quam weder in zijn schip ende bleef soe sitten opten boort. Corts daer na quam een ander schip van Harderwijck, die deze inne nam, daar zij God ende Onse L. vrou off danckten ende loeffden. Ende zij deden haer bevaert, als zij geloeft hadden.
355
Iten het was een vrou van Arnhem, die een kijndt had van 8 daghen, dat worden beijde zijn ooghen bloeijende ende swetende. Zij loeffden haer bevaert mitten kijnde tot Onse L. Vrou ende te handt wert het gesont.
356
Item het was een vrou van Emmerick, die mit een oghe slechs blijnt geworden was. Zij loeffde haer bevaert Onse L. Vrou ende als zij onderweghen was, wert zij weder siende.
357
Item het was een voru van Elst inder Betuwe, ende quam hier beseten, gebonden mit veteren ende banden, bietende ende slaende haer selven. Ende doe zij voer Onse L. Vrouwen beeldt quam, lach zij verveerlick roepende. Doe loeffden zij haer bevaert, die bij haer waren, weder te coemen ende haer laten te weghen. Doe zij een halff mijle van Amersfoert was gecomen, ontbantmense ende zij was verlost ende zeedich als zij ije geweest hadde.
