MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
357
Item het was een voru van Elst inder Betuwe, ende quam hier beseten, gebonden mit veteren ende banden, bietende ende slaende haer selven. Ende doe zij voer Onse L. Vrouwen beeldt quam, lach zij verveerlick roepende. Doe loeffden zij haer bevaert, die bij haer waren, weder te coemen ende haer laten te weghen. Doe zij een halff mijle van Amersfoert was gecomen, ontbantmense ende zij was verlost ende zeedich als zij ije geweest hadde.
358
Item het was een knecht van x jaeren die lange tijt drie lopende gater gehadt hadde, daer hij om te Mise bevaert geweest had ende hem nijet en halp. Doe loeffde hij zijn bevaert Onse L. Vrou ende nae drie uren stempten die lopende gater, alzo dat hij des derde daghes wel te passe was. Ende quam en dede zijn bevaert.
359
Item het was een maghet van Tiel, die altemael blijnt geworden was, overmits een vluijs, dat gewessen was over haer oghen, alzo dat haer geen meijster vermat te helpen. Zij loeffde haer bevaert te doen bervoets sonder eeten ende sonder drincken. Sich, doe zij tot Onser L. Vrouwen quam, wert zij voer Onsr L. Vrouwen beeldt weder siende ende zij ghijnck blidelick weder t’huijs.
360
Item het was een kijndt tot Amersfoert van een jaer, dat liep spielen ende viel in een ketel mit water, alzo dat die moeder dat kijndt vant, staende op zijn hoeft. Ende zij en wiste nijt hoe lange dattet daer inne geweest had. Zij toech haestelick weder vuijt, kout ende all stijff, alzo dattet voer doot lach. Die moeder loeffde haer bevaert mitten buren tot Onser L. Vrouwen dat kijndt te weghen. Ende te hant wert het levende, maer het bleeff omtrent twe of drie uren blijnt, tot dat die Ave Maria clock geluijet was. Doe wert het siende, nae dat die bevaert gedaen was, ende die moeder mit die buren Onse L. Vrou anderwerff aenriepen. Ende dit geschiede op Onse L. Vrouwe hemelvaerts dach.
