MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
360
Item het was een kijndt tot Amersfoert van een jaer, dat liep spielen ende viel in een ketel mit water, alzo dat die moeder dat kijndt vant, staende op zijn hoeft. Ende zij en wiste nijt hoe lange dattet daer inne geweest had. Zij toech haestelick weder vuijt, kout ende all stijff, alzo dattet voer doot lach. Die moeder loeffde haer bevaert mitten buren tot Onser L. Vrouwen dat kijndt te weghen. Ende te hant wert het levende, maer het bleeff omtrent twe of drie uren blijnt, tot dat die Ave Maria clock geluijet was. Doe wert het siende, nae dat die bevaert gedaen was, ende die moeder mit die buren Onse L. Vrou anderwerff aenriepen. Ende dit geschiede op Onse L. Vrouwe hemelvaerts dach.
361
Item het was een wijff vuijt een derp, dat geheten was die Helle, die acht daghen in arbeijde ghijnck, alzo dat alle die vrouwen iamer aen haer saghen. Zij loeffden haer bevaert t’ Amersfoert ende te hant chreech zij een doot kijndt. Zij riepen Onse L. Vrouwe aen ende over een halff ure ontwerpet kijnt ende wert weder levende.
362
Item het was een man van Zoest, die turff int veen groeff, daer hij bijster sijnre sinnen wert ende lange tijt gesloten lach. Doe quam hem in zijn sinne, dat hij zijn bevaert t’ Amersfoert loven soude tot Onse L. Vrou. Ende doe hij zijn bevaert geloeft had, spranck dat slot ontwee. Ende hij quam hier tot Onse L. Vrouwe en dede zijn bevaert gesont ende wel te pas.
